Учредитель Министерство культуры Республики Крым

Маариф хызметине багъышлангъан омюр (Джафер оджа Бекировнынъ 85 йыллыгъы мунасебетинен)

Джафер оджа, сиз эр даим къальбимизде –

Бир сёнмейджек мешъаль олып янаджакъсыз!

Сиз огреткен догъмуш ана тилимизде,

Сизни оджам, омюр билля анъаджакъмыз!

Черкез-Али, 1998 с.

Джафер Бекирович Бекиров 1935 сенеси июнь 9-да Къырым АССРнинъ Куйбышев районындаки Къаралез коюнде догъа. Генчлиги гъурбетликте – Озьбекистанда кече. 1960 сенеси Низамий адына Ташкент девлет педагогика институтынынъ рус филологиясы факультетини битирип, Сырдарья виляетинде оджалыкъ фаалиетини башлай. 1963 сенеси Чырчыкъ шеэриндеки орта мектепте окъув болюги мудир муавини, эм де рус тили ве эдебияты оджасы оларакъ фаалиетини девам эте. 1968 сенеси оны озю окъугъан педагогика институтындаки СССР Халкълары эдебияты кафедрасына оджа оларакъ къабул этелер. 1970 – 1987 сенелери исе о, шу институтта окъув болюгининъ мудири олып чалыша. 1976 сенесинден – къырымтатар тили ве эдебияты кафедрасында доцент вазифесини эда этиджи оджа, 1981 сенесинден исе доцент (приватдоцент). 1987 сенесинден рус ве къырымтатар филологиясы факультети деканынынъ муавини, эм де кафедра мудири (1989 с.) вазифелерини одей.

Халкъымыз Къырымгъа кутьлевий тарзда къайтып башлагъан йылларда Джафер оджа къырымтатар тили ве эдебияты болюгини Къырымгъа авуштырмакъ ишлерине фааль кирише. 1990 сенеси Симферополь девлет университетинде къырымтатар тили ве эдебияты болюги ачыла. Сюргюнликтен сонъ Къырымда къырымтатар тили ве эдебияты болюгининъ ачылувы – халкъымызнынъ эм медений, эм маневий, эм сиясий аятындаки муим вакъиа эди. Бу иште Джафер оджанынъ буюк иссеси олды. О, бу илим дергяхында филология факультети деканынынъ муавини, къырымтатар эдебияты кафедрасынынъ мудири вазифесинде омрюнинъ сонъуна къадар чалышты.

Къырымтатар фольклористикасы саасында эппейи вакъыт исрарлыкънен чалышкъан Джафер Бекирович Бекиров эдебиятымыз тарихы ве фольклорджылыгъымыз боюнджа мектеп талебелери ве алий окъув юртларынынъ студентлери ичюн нешир этильген бир сыра китапларнынъ муэллифи, муэллифдеши я да тертип этиджисидир. Онынъ «Эдебият хрестоматиясы» (1971), «Татар фольклоры» (1975), «Эдебият тарихы» (1982), «Дестанлар», «Къырымтатар халкъ агъыз яратыджылыгъы» (1991), «Бала фольклоры» (1993), «Къырымтатар бала эдебиятынынъ хрестоматиясы» (1998) киби дерсликлери ве къулланмалары озь девринде эдебиятымызны, алельхусус, фольклорымызны огренювде студентлер ичюн екяне менбаа вазифесини одеп кельди.

Алимнинъ язы масасы узеринде къалгъан эльязмалары эсасында «Несиллерден несиллерге мирас» адына невбеттеки джыйынтыгъы 2012 сенеси дюнья юзю корьди.

Теджрибели оджа, орта ве алий тасильнинъ тешкилятчысы, къырымтатар фольклоры ве эдебиятынынъ теткъикъатчысы Джафер оджа Бекиров 1998 сенеси июль 7-де Акъмесджитте вефат этти ве Абдал мезарлыгъында дефн олунды.

Джафер оджа озюнинъ бутюн омрюни маариф хызметине багъышлады. Онынъ талебелери маариф, илим, журналистика, наширлик киби сааларда чалышмакъталар. Олар Джафер оджаны даима самимий къальб сёзлеринен хатырлайлар.

Харахады А.М.,

Къырымтатар медений-тарихий мирасы музейининъ

кучюк ильмий хадими

Галерея

RU   QT
Обратная связь